Xosé
Lluis Campal
RIDEA
I. L’autor
Los biltos del teatru modernu n’asturianu demientres el
sieglu pasáu allúguenlos los estudiosos hai una centuria, en
1909, cuando l’académicu y narrador José Francés (1883-1964)
pronunció’l 14 de xunu d’aquel añu, nel Centru Asturianu de
Madrid, una conferencia abondo citada y titulada El
teatro asturiano. Lleída agora, na distancia, apúrremos
una semeya romántica d’apelación a nuevos caminos, naguaba
por emburriar a los cultivadores del teatru llariegu a una
renovación de la lliteratura que se facía pa xubir a los
escenarios, poco ambiciosa. D’ente los nomes colos que se
dirá encadarmando la hestoria entá non escrita del teatru en
bable nun hai qu’escaecese d’ún: el d’Eloy Fernández
Caravera.
Fernández Caravera, que naciera nel barriu avilesín de La
Texera’l 13 de xunetu de 1887 y morriera na mesma ciudá’l 9
de marzu de 1983, xuncióse, no profesional, al mercáu testil
(heredó la firma Los Telares, que fundare so pá) y, no
creativo, a les aficiones teatrales, anque tamién dexó una
montonera de poesíes y dos noveles (Mayita y La
forastera), asoleyaes como folletones por entregues na
prensa local, nel mesmu centenariu diariu onde diose a
conocer en 1908 col cuentu Los pajaritos sabios. Pa
les revistes y periódicos del so conceyu ufrió Caravera
munches collaboraciones, nes que prodigó seudónimos como
Loy de la Cabornia, El Duende de la Luneta,
Pinón de la Pata Curtia, Pepe Rivero, Loy de
la Texera, Paquito Candil, Canutito,
Xuaco Bonielles o Un Gaitero de la Reserva.
Desvirgóse teatralmente Fernández Caravera cola pieza Los
pescadores de caña, diálogu en prosa estrenáu nel Teatru
Circu Somines y del que’l lliteratu avilesín Luis Ménendez
Alonso, Lumen, dixo –como recueye Constantino Suárez,
Españolito, nel tercer tomu del so índiz
Escritores y artistas asturianos (1936)– que con esa
obrina allumábase n’España’l xéneru del astracán, «que años
más tarde habría de popularizar el infatigable Muñoz Seca».
Les coordenaes temporales nes qu’opera la produición
comediógrafa d’Eloy Fernández Caravera son, nun primer
momentu, la década del 10 y, tres un paréntesis –la so
familia afirma que, alredor del añu 20, Caravera destruyó
tolo que tenía escrito–, los años 40 del sieglu XX. A la so
autoría correspuenden, aparte del citáu Los pescadores de
caña, los siguientes testos:
1) Telva (xuguete cómicu nun actu y dos cuadros
estrenáu’l 14 d’avientu de 1910 nel Teatru Iris d’Avilés).
2) El gallo de la quintana (comedia nun actu
estrenada’l 4 de mayu de 1912 nel Teatru Circu Somines
d’Avilés).
3) Rosina (comedia costumista de 1916, la única
premiada y na qu’apararemos depués).
4) Xuaca la texedora (comedia d’ambiente
asturianu en tres actos y compuesta seique na seronda de
1943).
5) El abeyón (comedia en dos actos estrenada’l 8
d’avientu de 1943 nel Teatru Palacio Valdés d’Avilés).
6) El burru del tíu Bernaldo (comedia en tres
actos representada’l 14 de febreru de 1945 nel Teatru
Principado d’Uviéu).
7) Después de vieyos, gaiteros (comedia en tres
actos estrenada nel Teatru Robledo de Xixón el 13
d’avientu de 1945).
8) El chigre de Generosa (Folletín de aldea)
(comedia d’ambiente asturianu en tres actos compuesta
seique nel branu de 1945).
9) La sugestión de Celedonio (comedia en tres
actos estrenada’l 15 de setiembre de 1945 nel Teatru-Casinu
d’Arnao).
A éstes améstense otres que nun pasaron del papelu a les
tables, como: El trasgo, El Martón en Bardasquera,
Lo que el diaño se llevó, Amores de segunda flor,
La concencia de Buraquinos, Lo que traxo la mar,
La cerezal de Balba, Colasa maquiavélica,
La romería de San Bartolomé, Cuando la quintana
pierde [o perdió] su ritmo, el llibretu de
zarzuela En la paz de la aldea y delles más. El so
fíu Fernando Fernández de Soignie, nel prólogu a la edición
d’El chigre de Generosa (Uviéu, Teatru Casona,
coleición “Retablu xovial”, 2, 1997), cifra en 18 les obres
qu’ideare Caravera dende los años 40, nuna segunda etapa
d’escritura teatral.
II. Rosina
La pieza teatral Rosina acabó d’escribila Eloy
Fernández Caravera nel mes de mayu de 1916 na Texera, como
asina consta na cabera páxina de la so primer edición
embaxo’l preceutivu “Telón”. Ye, en pallabres del autor, un
«boceto de comedia de costumbres asturianas en un acto, en
bable y en prosa»; un trabayu que resultó galardonáu, col
segundu premiu ex aequo, esi mesmu añu (y quiciabis fuera
concebíu dende tal premisa motivadora) nel Concursu pa
Criyar el Teatru Asturianu de la Naturaleza, empobináu pol
Club Náuticu de Salines1.
El xuráu del certame tenía un puxu eruditu bien péritu,
porque formábenlu: Rogelio Jove y Bravo (académicu de la
Real de la Hestoria), Adolfo Fernández Villaverde (mayestru
y direutor de les Colonies Escolares de Salines), Benito
Álvarez-Buylla y Lozana (caderalgu ciencies que fexo enforma
distinguíu l’alcuñu Silvio Itálico), David Arias (abogáu
avilesín qu’emplegare’l ñomatu Ánemos y va publicar
dos noveles bien feches: Después del gas y Llegará
del mar) y Antonio María Valdés (responsable, en 1915,
de la comedia El llibriquín del siñor cura, redactada
a comuña con José Martín Fernández). Al certame
presentáronse once obres, pero 5 refugáronles porque nun
s’axustaben a les bases del concursu. Quedó ermu’l primer
premiu, «por no llenar ninguna de las seis referidas
producciones el objetivo deseado», como indicaba’l 25 de
xunu de 1916 el diariu xixonés El Comercio. El
segundu premiu distribuyóse, a partes iguales, ente la obra
de Fernández Caravera y la de Pachín de Melás
entitulada Na quintana (Cuadro bable de costumbres
asturianas), dividida en siete escenes d’un actu únicu.
La puesta de llargo de Rosina foi modesta, pos
ficiéronse cargu d’esi honor xente amateur. Los actores
qu’estrenaron la obra pertenecíen a la colonia de braneantes
d’esa afamada villa costera2,
centru punteru de la vida social nos meses d’estíu naquel
espoxigante entamu del sieglu XX. Taba previsto que
s’estrenare’l sábadu 19 d’agostu de 1916, a les seis de la
tardi3, pero les
inclemencies meteorolóxiques aplazaron la función pal martes
22. Púnxose n’escena «en un escenario ad hoc
levantado en el campo, teniendo por fondo la Naturaleza»,
como diz el propiu Fernández Caravera, siñalando del mesmu
mou que l’aición asítiase nel branu y na mesma dómina y
estación nes que pudo escribise, colo que paez tar pensando
tamién, d’algamar el premiu, nuna cómoda representación:
desenróllase, apunta’l comediógrafu, en «época actual y, por
lo tanto, los personajes vestirán como hoy viste la gente de
aldea, la gente que trabaja». Detéctase nesta coherencia
temática y temporal una voluntá ñidia, por parte del
escritor, de facer un teatru rexonal que reflexe la realidá
asturiana aldeaniega, pa destremase de lo que taben faciendo
otros autores qu’utilizaben el mesmu o asemeyáu rexistru
idiomáticu pa dirixise a un públicu famientu d’identidaes
actualizaes.
L’espaciu escénicu alude a esi mediu campesín y
descríbesemos nel entamu de Rosina de la forma que
vien darréu: «A la izquierda, una casita modesta, de planta
baja, y adosado a ésta, en segundo término, el corral. A la
derecha, una panera. De foro, una muria o bardal, con
división en el centro para una portilla destartalada, que es
la que da acceso a la quintana desde la calleja. Junto al
pegollo primero de la panera, una figal. Diseminados
por escenas algunos aperos de labranza, de los más
primitivos. Izquierda y derecha, las del actor».
Rosina
fala somanera de los problemes y enguedeyos que tien de
sópitu una mocina pa casase. Poro, el conflictu sentimental
ye’l megollu la trama, y ta desendolcáu con gracia
costumista efeutiva, anque lóxicamente ensin proponer
novedaes importantes no que cinca al plantegamientu del
asuntu y al desenllaz, y respuende al pensamientu
tradicionalista que rixía nel campu asturianu d’hai un
sieglu. Amás, les sos intenciones d’entretener al públicu
d’equí y al de la emigración americana (onde viaxen les sos
obres como ayalga rentable de los repertorios de les
compañíes asturianes que percorríen los grandes centros
migratorios d’Asturies) llimiten les posibilidaes de facer
coses distintes, qu’escurque tampoco nun sedría’l propósitu
prioritariu del avilesín.
Esta comedia aldeaniega de Caravera que recibiera los
plácemes d’un competente xuráu articúlase alredor de
ventisiete escenes, nes qu’una decena de personaxes (un piñu
xóvenes –una moza, Rosina, de 17 años; un rapaz, Lelo, de
20; dos guajes de 6 y 7 años; dos neñes de 3 y 4 años y un
nenu de cuello– y un grupu mayores: el siñor Cura, que tien
50 años, y Ramona y Pachín, que ya cumplieren los 60 y 70,
respeutivamente) maniobren nun llinguaxe dramáticu que nun
aveza a atascase nos llugares comunes nin cai na vulgaridá,
polo que pue dicise qu’hai un mínimu de decoru artísticu y
llingüísticu. Al falaxe qu’usen les sos criatures califícalu
Caravera de «muy moderado para dar facilidad a los actores
no asturianos». N’ostante, nun ye repunante y déxa-yos toles
llibertaes del mundu anque l’elencu d’actores y actrices
seyan de casa: «Si éstos –sorraya’l comediógrafu na nota
inicial de Rosina– fueran asturianos, háblenlo como
lo hagan los aldeanos de su comarca, pues ya todos sabemos
que este dialecto varía de uno a otro punto con lamentable
notoriedad». Al paecer, los actores de la Compañía Asturiana
de Comedies, que pasiaron les obres de Caravera per Asturies
y Hispanoamérica, facíen interpretaciones mui personales de
les pieces que llevaben nel so programa. Dotramiente, les
acotaciones y informaciones precises pa la puesta n’escena
danse n’español, como yera norma en cuasi tolos autores
qu’emplegaben el bable pa vehicular les sos criyaciones.
Depués d’estrenada, Rosina asoleyóla’l mesmu
escritor, embaxo’l sellu de la Sociedá d’Autores Españoles,
esi añu de 1916 nes prenses avilesines del Establecimientu
Tipográficu “El Comercio”, que taba domiciliáu na cai
Marqués de Pinar del Río, 22. La edición ye d’un gustu raru
pa lo qu’entós s’estilaba, y queda como modelu de les
posibilidaes editoriales, lóxicamente non rentabilizaes, nun
tiempu más idealista que mercantilista, y d’amorosiegos
enfotos a la busca d’un esperanzáu remanecer, el d’un teatru
seriu pero acesible, fechu na llingua’l pueblu y que nun
renuncie, nin escuenda o marute, los sos oríxenes
culturales.
Notas
1 Les 9 bases del certame, tal como les asoleyara en
castellán La Voz de Avilés el miércoles 22 de setiembre de
1915, yeren éstes: «1) Amplia libertad respecto al
desenvolvimiento del asunto (número de actos, matiz y medios
de expresión); 2) Se concederán dos premios. Primero: 500
pesetas. Segundo: 150 pesetas; 3) Se remitirá un ejemplar
escrito a máquina al Secretario del Club Náutico, don Benito
Á. Buylla, Toreno 4, Oviedo, con los requisitos ordinarios
en esta clase de concursos; 4) Las obras premiadas (que lo
serán por su mérito absoluto) quedan de propiedad de sus
autores, pero éstos no cobrarán derechos de representación
al Club Náutico; 5) El plazo de admisión de obras termina el
31 de mayo de 1916; 6) El jurado se dará a conocer en tiempo
oportuno; 7) El jurado podrá recomendar la representación de
alguna de las obras no premiadas, si lo creyere oportuno, y
en este caso el Club Náutico pagará a sus autores los
derechos ordinarios; 8) Las obras premiadas y las
recomendadas se pondrán en escena en el lapso de tiempo
desde el 15 de julio al 20 de agosto de 1916; 9) El fallo se
hará público en la segunda quincena de junio».
2 Los intérpretes fueron: Teresita Hernández (nel papelu de
Rosina), Asunción Madariaga (como Ramona), Jesús G. Ovies
(dando vida a Pachín), José Torre (nel papelu de Lalo),
Ramón García López (como’l siñor Cura) y los neños Celestino
Fernández y Eloy Fernández, qu’encarnaben a Quico y a Pepín.
3 La función componíase, como lleemos n’El
Comercio (18-VIII-1916), de: «Sinfonía o intermedios de
música asturiana por la laureada Banda municipal de Avilés.
Un diálogo en bable de Pachín de Melás y la comedia premiada
en el concurso, original de Paquito Candil (don Eloy F.
Caravera), Rosina». El mesmu rotativu recueye los precios de
les localidaes: «Palcos, seis sillas con entradas, por
abono, 20 pesetas; sin abono, 30 pesetas. Sillas, con abono,
2,50 pesetas; sin abono, 3 pesetas. Billetes de paseo, con
abono, 1 peseta; sin abono, 1,50 pesetas. Entrada general,
con abono, 0,50 pesetas; sin abono, 0,75». Y da tamién los
sitios onde puen mercase: «En Salinas, en el Pabellón Ideal
y en el Club Náutico. En Oviedo, en el Real Automóvil Club y
en la sombrerería El Modelo. En Gijón, en el kiosco de
Pachín de Melás, y en Avilés, en la confitería de Galé».